Col 2 | KhmKCB | STEP | ខ្ញុំ ចង់ ឲ្យ អ្នករាល់គ្នា ដឹង ថា ខ្ញុំ តយុទ្ធ ខ្លាំង យ៉ាងណា ដើម្បី អ្នករាល់គ្នា ដើម្បីពួក អ្នក ក្រុង ឡៅឌីសេ និង ដើម្បីពួកមនុស្សទាំងឡាយ ដែល មិន ទាន់ បាន ជួប មុខ ខ្ញុំ នៅ ឡើយ

Colossians 2

1 ខ្ញុំចង់ឲ្យអ្នករាល់គ្នាដឹងថាខ្ញុំតយុទ្ធខ្លាំងយ៉ាងណាដើម្បីអ្នករាល់គ្នាដើម្បីពួកអ្នកក្រុងឡៅឌីសេនិងដើម្បីពួកមនុស្សទាំងឡាយដែលមិនទាន់បានជួបមុខខ្ញុំនៅឡើយ 2 គឺឲ្យពួកគេទទួលបានការកម្សាន្ដចិត្ដរួបរួមគ្នានៅក្នុងសេចក្ដីស្រលាញ់ហើយមានការយល់ដឹងយ៉ាងជឿជាក់និងយ៉ាងបរិបូរដើម្បីឲ្យពួកគេស្គាល់អាថ៌កំបាំងរបស់ព្រះជាម្ចាស់ដែលជាព្រះគ្រិស្ដ 3 ដ្បិតកំណប់នៃប្រាជ្ញានិងចំណេះដឹងទាំងឡាយបានលាក់ទុកនៅក្នុងព្រះអង្គ។ 4 ខ្ញុំនិយាយដូច្នេះដើម្បីកុំឲ្យអ្នកណាម្នាក់បញ្ឆោតអ្នករាល់គ្នាដោយពាក្យលួងលោមបានឡើយ។ 5 ដ្បិតទោះបីខ្ញុំមិននៅជាមួយអ្នករាល់គ្នាខាងសាច់ឈាមក្ដីក៏ខ្ញុំនៅជាមួយអ្នករាល់គ្នាខាងវិញ្ញាណដែរហើយខ្ញុំមានអំណរដែលឃើញអ្នករាល់គ្នាមានសណ្ដាប់ធ្នាប់ទាំងមានជំនឿខ្ជាប់ខ្ជួននៅក្នុងព្រះគ្រិស្ដ។ 6 ដូច្នេះអ្នករាល់គ្នាទទួលព្រះអម្ចាស់យេស៊ូគ្រិស្ដជាយ៉ាងណាចូររស់នៅក្នុងព្រះអង្គជាយ៉ាងនោះចុះ 7 ហើយចាក់ឫសនិងស្អាងឡើងនៅក្នុងព្រះអង្គព្រមទាំងមានជំនឿមាំមួនដូចដែលអ្នករាល់គ្នាបានទទួលការបង្រៀនរួចមកហើយទាំងអរព្រះគុណឲ្យច្រើនឡើង។ 8 ចូរប្រយ័ត្នក្រែងលោមានអ្នកណាម្នាក់ចាប់អ្នករាល់គ្នាជាឈ្លើយដោយប្រើទស្សនវិជ្ជានិងពាក្យបញ្ឆោតឥតប្រយោជន៍ដែលស្របតាមទំនៀមទម្លាប់របស់មនុស្សនិងគោលការណ៍បឋមរបស់លោកិយនេះដែលមិនស្របតាមព្រះគ្រិស្ដ 9 ដ្បិតគ្រប់ទាំងសេចក្ដីពោរពេញនៃលក្ខណៈរបស់ព្រះជាម្ចាស់ស្ថិតជារូបរាងនៅក្នុងព្រះគ្រិស្ដ 10 ហើយអ្នករាល់គ្នាក៏បានពេញនៅក្នុងព្រះអង្គដែរដ្បិតព្រះអង្គជាព្រះសិរលើការគ្រប់គ្រងនិងសិទ្ធិអំណាចទាំងអស់ 11 ហើយនៅក្នុងព្រះអង្គអ្នករាល់គ្នាក៏បានទទួលការកាត់ស្បែកដែរគឺមិនមែនជាការកាត់ស្បែកដោយដៃមនុស្សទេប៉ុន្ដែជាការកាត់ស្បែកខាងឯព្រះគ្រិស្ដដែលជាការដោះរូបកាយខាងសាច់ឈាមចេញ។ 12 អ្នករាល់គ្នាត្រូវបានបញ្ចុះជាមួយព្រះគ្រិស្ដតាមរយៈពិធីជ្រមុជទឹកហើយក៏បានរស់ឡើងវិញជាមួយព្រះអង្គដែរតាមរយៈជំនឿលើអានុភាពរបស់ព្រះជាម្ចាស់ដែលបានប្រោសព្រះគ្រិស្ដឲ្យរស់ឡើងវិញ 13 នៅពេលអ្នករាល់គ្នាស្លាប់នៅក្នុងបាបនិងការមិនកាត់ស្បែកខាងសាច់ឈាមព្រះអង្គបានប្រោសអ្នករាល់គ្នាឲ្យមានជីវិតរួមជាមួយព្រះអង្គទាំងលើកលែងទោសបាបទាំងអស់របស់យើងផង 14 ហើយព្រះអង្គបានលុបចោលកំណត់ត្រាដែលទាស់នឹងយើងគឺបញ្ញត្ដិទាំងឡាយដែលប្រឆាំងយើងហើយព្រះអង្គបានដកបញ្ញត្ដិទាំងនោះចេញដោយដំភ្ជាប់ទៅនឹងឈើឆ្កាង។ 15 ព្រះអង្គបានបំផ្លាញអំណាចនៃការគ្រប់គ្រងនិងសិទ្ធិអំណាចទាំងឡាយដោយបំបាក់មុខពួកវានៅទីសាធារណៈហើយបានយកឈ្នះពួកវាដោយឈើឆ្កាង។ 16 ដូច្នេះកុំឲ្យអ្នកណាម្នាក់ថ្កោលទោសអ្នករាល់គ្នាអំពីការបរិភោគការផឹកឬអំពីពិធីបុណ្យបុណ្យចូលខែនិងថ្ងៃសប្ប័ទឡើយ 17 ដ្បិតការទាំងនេះគ្រាន់តែជាស្រមោលនៃអ្វីៗដែលត្រូវមកប៉ុណ្ណោះរីឯរូបពិតមាននៅក្នុងព្រះគ្រិស្ដ។ 18 ចូរកុំឲ្យអ្នកណាដែលចូលចិត្ដធ្វើពុតបន្ទាបខ្លួននិងថ្វាយបង្គំទេវតាមកបញ្ឆោតអ្នករាល់គ្នាឲ្យបាត់រង្វាន់ឡើយពួកគេជាមនុស្សនិយាយស៊កសៀតអំពីអ្វីដែលពួកគេឃើញហើយអួតឥតប្រយោជន៍ដោយគំនិតខាងសាច់ឈាមរបស់ពួកគេ 19 ពួកគេមិននៅជាប់នឹងព្រះគ្រិស្ដដែលជាក្បាលទេគឺដោយសារក្បាលហើយទើបរូបកាយទាំងមូលត្រូវបានផ្គត់ផ្គង់ហើយភ្ជាប់គ្នាដោយសារសន្លាក់និងសរសៃទាំងឡាយទាំងចម្រើនឡើងតាមសេចក្ដីចម្រើនរបស់ព្រះជាម្ចាស់។ 20 បើអ្នករាល់គ្នាបានស្លាប់ជាមួយព្រះគ្រិស្ដហើយរួចផុតពីគោលការណ៍បឋមរបស់លោកិយនេះមែនហេតុអ្វីបានជាអ្នករាល់គ្នាហាក់ដូចជារស់នៅក្នុងលោកិយដោយចុះចូលនឹងបញ្ញត្ដិទាំងឡាយដូចជា 21 កុំកាន់កុំភ្លក់ឬកុំពាល់ដូច្នេះ? 22 បញ្ញត្ដិទាំងនេះសុទ្ធតែជាបទបញ្ជានិងសេចក្ដីបង្រៀនរបស់មនុស្សដែលសាបសូន្យទៅតាមការប្រើប្រាស់។ 23 បញ្ញត្ដិទាំងនោះទំនងដូចជាមានប្រាជ្ញាដោយឲ្យថ្វាយបង្គំស្ម័គ្រចិត្ដបន្ទាបខ្លួននិងលត់ដំរូបកាយជាដើមប៉ុន្ដែគ្មានតម្លៃអាចតទល់នឹងចំណង់របស់សាច់ឈាមបានឡើយ។